ᤗᤠᤔᤡᤇᤠᤏᤧᤴ ᤁᤩᤠᤳ ᤔᤠᤏᤧ ᤒᤡᤖᤠᤗᤥ ᤏᤢ ᤁᤥᤕᤧᤶᤒᤠ ᤔᤡᤕᤱᤒᤠ

                                      
    ᤂᤛ᤻ ᤐᤧᤏᤣ ᤛᤠᤵᤛᤰ ᤁᤧᤏᤡᤵᤐᤠ ᤁᤧᤛᤠᤵᤐᤠᤖᤧ ᤛᤢᤶᤈᤥ ᤗᤧᤵᤛᤠᤱ ᤛᤱᤁᤷ ᤗᤠᤔᤡᤇᤠᤏᤧᤖᤧ ᤁᤢᤔᤡᤱ ᤔᤧ᤺ᤴᤄᤧᤶᤔᤏᤠ ᤔᤧ᤺ᤴᤏᤡᤔᤏᤠ ᤛᤠᤖᤡᤰ ᤛᤠᤖᤡᤰ ᤀᤠᤜᤠᤣ᤺ᤵᤀᤡᤗᤠ ॥ ᤐᤠᤜᤢᤏᤧ ᤋᤢᤳᤋᤢᤃᤧᤴ ᤛᤢᤶᤈᤥᤛᤠᤶᤒᤠ ᤛᤱᤁᤷ ᤗᤠᤔᤡᤇᤠᤏᤧᤖᤧᤴ ᤗᤳᤌᤡᤰ ᤁᤢᤔᤡᤱ ᤁᤧᤍᤡᤵᤐᤠ ᤛᤢᤶᤈᤥᤎᤡᤰ ᤘᤠ ''ᤁᤩᤠᤳ ᤔᤠᤏᤧ ᤒᤡᤖᤠᤗᤥ'' ॥ ᤁᤴ ᤛᤢᤶᤈᤥ ᤛᤡᤃᤠᤱ ᤂᤢᤏᤧ ᤗᤳᤌᤡᤰ ᤘᤣ᤹ᤗᤠᤈᤣ ᤀᤔᤣᤖᤡᤁᤠ ᤁᤧᤕᤢᤱᤒᤠ ᤔᤡᤰᤑᤢᤢᤗᤠᤛᤠᤒᤠ ᤗᤠᤔᤡᤇᤠᤏᤧᤏᤢ ᤁᤧᤍᤱᤒᤠ ᤁᤢᤴᤍᤣᤱᤒᤠᤎᤡᤰ ᤘᤠ ॥ ᤁᤢᤴᤍᤣᤱᤒᤠᤸᤗᤧ ᤗᤳᤌᤡᤰ ᤔᤡᤕᤱᤒᤠ ᤜᤡᤱᤄᤢᤀᤠᤱ ᤁᤳᤋᤢ ॥ ᤁᤢᤴᤍᤣᤱᤒᤠᤴ ᤛᤵᤔᤠ ᤀᤠᤒᤠᤱᤅᤣ ᤁᤢᤗᤠᤈᤣ ᤀᤔᤧᤖᤡᤁᤠ ᤐᤣ᤺ᤰᤐᤠ ᤐᤠᤣ᤺ᤱ ॥ ᤂᤢᤏᤧ᤹ ᤁᤢᤗᤠᤈᤣ᤹ ᤐᤣ᤺ᤰᤁᤡᤸᤗᤧ ᤑᤖᤡᤰ ᤂᤢᤏᤧ᤹ ᤜᤡᤱᤄᤢᤀᤠᤱ ᤁᤳᤋᤢᤒᤠ ᤔᤡᤕᤱᤒᤠᤴ ᤀᤥᤃᤧᤔᤵᤐᤠ ᤁᤧᤜᤡᤱᤒᤠ ᤁᤧᤒᤡ᤹ᤒᤠ ᤕᤠᤵᤔᤡ ᤔᤧᤄᤥᤛᤢᤛᤡᤴ ॥ ᤛᤱᤁᤷ ᤗᤠᤔᤡᤇᤠᤏᤧᤀᤠᤱ ᤂᤩᤠᤒᤠ, ᤔᤡᤕᤱᤒᤠ ᤁᤢᤛᤡᤖᤠ ᤁᤧᤎᤠᤱᤒᤠ ᤕᤠᤵᤔᤡ ॥ ᤕᤶᤔᤥ ᤁᤧᤍᤱᤒᤠ ᤁᤢᤴᤍᤣ᤺ᤱᤒᤠᤀᤠᤱ, ᤜᤧᤴ ᤔᤡᤕᤱᤒᤠᤴ ᤀᤥᤔᤵᤔᤠ ᤀᤡᤎ᤺ᤠᤵ ᤗᤠᤔᤡᤇᤠᤏᤧᤖᤧᤀᤣ ᤂᤥᤛᤢ ॥ ᤁᤢᤴᤍᤣ᤺ᤱᤒᤠᤴ ᤘᤣ᤹ ᤗᤠᤈᤣ᤹ ᤐᤣ᤺ᤰᤁᤠᤱᤎᤥ ᤗᤠᤔᤡᤇᤠᤏᤧᤖᤧ ᤔᤡᤕᤱᤒᤠᤴ ᤁᤢᤜᤡᤶᤔᤥ ᤋᤠᤖᤢ᤹ ॥ ᤁᤖ ᤂᤧᤴ ᤔᤡᤕᤱᤒᤠᤴ ᤏᤡᤛᤢᤀᤠᤱ ᤗᤠᤔᤡᤇᤠᤏᤧ ᤁᤢᤏᤡᤱᤘᤠ ᤔᤠ ॥ ᤔᤡᤕᤱᤒᤠᤴ ᤃ ᤐᤠᤜᤠᤖᤠᤍᤧᤴ (ᤜᤡᤎᤠᤶᤒᤢ) ᤖᤰ ᤜᤡ ᤁᤣᤀᤣᤔᤠ ᤖᤧᤳᤇ ॥  ᤔᤡᤕᤱᤒᤠᤴ ᤋᤠ᤺ᤴᤇᤥᤛᤠ ᤐᤠᤣ᤺ᤰᤁᤠᤱ ᤐᤠᤜᤠᤖᤠᤍᤧᤴᤀᤥ ᤐᤣ᤺ᤰᤐᤠ ᤖᤧᤳᤇ ॥ ᤐᤠᤜᤠᤖᤠᤍᤧᤴᤀᤥᤀᤠᤱ ᤏᤠᤶᤕᤠᤵᤔᤡᤖᤧ ᤐᤠᤜᤠᤖᤠ ᤆᤠᤣ᤺ᤰᤏᤠᤒᤠ ᤋᤧᤴᤀᤥ ᤐᤠᤜᤠᤖᤠ ᤔᤧᤈᤠᤣ᤺ᤰᤁᤡᤴᤒᤠ ᤖᤧᤳᤇ ॥ ᤂᤧᤴ ᤔᤡᤕᤱᤒᤠᤴᤃ ᤗᤳᤌᤡᤰ ᤛᤡᤱᤅᤡᤸᤗᤧᤴ ᤛᤴᤍᤠᤣ᤺ᤰ (ᤒᤠᤁᤛ᤻) ᤌᤡᤰ ᤕᤢᤱᤔᤠᤀᤠᤱ ᤂᤣ᤹ᤀᤥ ᤂᤠᤶᤔᤡᤴ ᤁᤰᤆᤠᤣ᤺ᤰᤔᤠ ᤕᤢᤱᤔᤠ ᤐᤠᤣ᤺ᤱᤒᤠ ᤖᤧᤳᤇ ॥ ᤔᤡᤕᤱᤒᤠᤴ ᤂᤧᤴ ᤛᤴᤍᤠᤣ᤺ᤰᤐᤠ ᤂᤠᤶᤔᤥᤀᤥ ᤜᤡᤀᤣᤀᤠᤱ ᤁᤢᤜᤡᤴ ᤂᤠᤶᤗᤧ ᤗᤢᤵᤋᤢᤀᤠᤱᤗᤰ ᤐᤠ᤺ᤰᤂᤠ ᤗᤴᤒᤠ ᤖᤧᤳᤇ ॥ ᤁᤴ ᤏᤡᤛᤢᤀᤠᤱ ᤗᤠᤔᤡᤇᤠᤏᤧ ᤁᤢᤏᤡᤱᤘᤠ ᤔᤕᤣ ॥ ᤁᤖ ᤁᤴᤓᤖᤡᤰᤗᤰ ᤔᤧ᤺ᤴ ॥ ᤂᤧᤴ ᤔᤡᤕᤱᤒᤠᤸᤗᤧ ᤘᤣ᤹ ᤀᤠᤱ ᤐᤖᤡᤰ ᤐᤖᤡᤰᤐᤠ ᤗᤧᤵᤕᤧ᤺ᤵᤑᤠ᤹ (ᤒᤠᤏᤡᤜᤖᤢ) ᤀᤠᤣ᤺ᤴᤎᤠᤰ ᤜᤣ᤺ᤰᤋᤢ ॥ ᤔᤡᤕᤱᤒᤠᤴ ᤋᤠ᤺ᤴᤇᤥ ᤐᤠᤣ᤺ᤰᤁᤠᤱ ᤀᤠᤒᤠᤱᤅᤥ ᤁᤢᤗᤠᤱ ᤁᤢᤜᤢᤰ ᤋᤢᤃᤢ ᤛᤠ᤺ᤰᤋᤢ ॥ ᤛᤢ᤺ᤴᤍᤢ, ᤗᤠ᤹ᤃᤢ᤹ᤀᤠᤱ ᤛᤠᤱᤛᤠᤱ ᤛᤣᤛᤣ ᤆᤠᤣ᤺ᤰᤛᤡᤱᤒᤠ ᤖᤧᤳᤇ ॥ ᤏᤢᤔᤠ/ᤒᤠ ᤆᤠᤣ᤺ᤰᤛᤡᤱᤅᤠᤱ ᤗᤰ ᤘᤠᤒᤠ ᤖᤧᤳᤇ ॥ ᤁᤴᤓᤖᤡᤰᤗᤰ ᤔᤧ᤺ᤴ ॥ ᤗᤠᤔᤡᤇᤠᤏᤧᤖᤧ ᤋᤢᤰᤛᤡ ᤗᤠ᤺ ᤂᤠᤖᤰ ᤔᤡᤕᤱᤔᤠᤴ ᤜᤡᤱᤄᤢᤸᤗᤧ ᤔᤡᤕᤱᤔᤠᤴᤗᤧ ᤁᤢᤛᤠ ᤌᤠᤵᤋᤢᤛᤡ ॥ ᤁᤢᤛᤠᤜᤠ᤹ ᤘᤣ᤹ ᤘᤣ᤹ ᤋᤧᤴ ᤆᤳᤋᤢ ᤁᤳᤋᤢᤛᤡᤒᤠ ॥ ᤁᤴ ᤔᤡᤕᤱᤔᤠᤸᤗᤧ ᤏᤡᤱᤔᤡᤜᤠ᤹ (ᤛᤋᤢᤪ) ᤀᤥᤏᤢ ᤁᤢᤛ᤻ᤛᤠᤜᤠ᤹ ᤛᤧ᤺ᤐᤔᤠᤛᤡ ᤑᤠᤱ ᤆᤥᤃᤢᤒᤠ ᤗᤠᤔᤡᤇᤠᤏᤧᤖᤧ ᤌᤠᤀᤡᤱ ᤂᤥᤛᤢ ॥  ᤛᤠᤏᤠ᤺ᤳ ᤆᤠᤣ᤺ᤰᤔᤠ ᤜᤢ᤹ᤖᤢᤛᤡᤒᤠ ᤐᤖᤡᤰ ᤐᤖᤡᤰᤐᤠ ᤜᤡᤱᤎᤠᤣ᤺ᤰᤂᤠ᤹ᤀᤥᤏᤢ ᤀᤠᤳᤋᤠᤴᤏᤡ ᤀᤠᤳᤋᤠᤴᤏᤡ ᤏᤡᤳᤇᤠᤶ ᤔᤠᤰᤋᤢᤒᤠ ᤐᤠ᤺ᤴᤜᤠ᤹ ᤛᤠᤵᤋᤢᤀᤠᤱ ᤐᤳ ॥
                    ᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆
     ᤀᤠᤱᤃᤠ᤹ ᤜᤡᤶᤔᤥ᤹ᤏᤢ ᤕᤠ᤺ᤶᤒᤰᤁᤥ ᤌᤠᤛᤡᤱᤔᤠ ᤑᤠ᤹ᤀᤠᤱ ᤗᤴᤍᤠᤱ ॥  ᤗᤠᤎᤠᤀᤥ ᤛᤢᤘᤠᤴ ᤁᤰᤆᤥᤃᤢᤱ ॥ ᤗᤰᤂᤢᤶᤔᤥ᤹ ᤀᤠᤶᤔᤠ ᤁᤢᤕᤠᤳ ᤗᤧ᤹ᤖ ᤀ᤺ᤰᤗ ᤕᤠᤰ ॥ ᤀᤰᤂᤣ ᤂᤡᤖᤡ ᤜᤡᤛᤡᤱᤅᤠᤱᤅᤠᤱ ᤀᤥᤔᤧᤳᤋᤢᤱ ॥ ᤗᤰᤂᤢᤶᤔᤡᤴ ᤁᤢᤖᤧᤶ ᤏᤠᤶᤐᤛᤢᤁᤧᤛᤢᤒᤠ  ᤜᤡᤓᤡᤵᤔᤧᤸᤗᤧ ᤋᤖᤢᤒᤠ ᤜᤣᤰᤁᤧᤍᤶᤒᤠ ᤂᤩᤠᤒᤠᤒᤡ, ᤔᤡᤕᤱᤒᤧᤸᤗᤧ ᤜᤡᤀᤣᤛᤢ ᤖᤧᤳᤇ ॥ ᤀᤠᤴᤍᤣ᤺ᤴᤏᤠᤱᤎᤥᤛᤠ ᤀᤠᤶᤔᤠ ᤁᤢᤕᤠᤳᤗᤧ᤹ᤖ ᤜᤡᤴ ᤋᤢᤃᤢᤖ ᤕᤠᤰᤐᤠᤖᤧᤳᤇ ॥ ᤂᤢᤏᤧ᤹ ᤀᤠᤒᤠᤱᤅᤣ ᤐᤠ᤺ᤳᤗᤀᤠᤱ ᤕᤠᤰ ॥ ᤔᤧ᤺ᤴᤒᤣ ᤐᤠᤱᤓᤣᤀᤥ ᤃ ᤔᤡᤕᤱᤒᤠᤖᤧ ᤜᤢᤴᤇᤡ ᤜᤡ ᤀᤠᤒᤠᤠᤱᤅᤧ ᤔᤧᤗᤢᤵᤋᤢ/ᤔᤧᤈᤡᤰᤂᤢ ॥ ᤐᤠᤱᤕᤰᤁᤥᤒᤠ ᤔᤡᤕᤱᤒᤠ ᤌᤣᤃᤧᤍᤶᤒᤠᤛᤡᤒᤣ ᥅ ᤀᤠᤒᤠᤱᤅᤣ ᤜᤡ ᤆᤡᤱᤔᤠ ᤔᤧᤴᤗᤧᤔᤏᤠ ॥ ᤗᤠᤶ ᤗᤠᤶ ᤗᤰ ᤁᤧᤗᤠᤣ᤺ᤰᤐᤠ ॥ ᤏᤠ ᤛᤢᤒᤠ᤹ ᤛᤧᤵᤔᤠ ᤔᤧᤗᤧᤛ᤻ᤛᤢ ᤏᤠ ᤜᤡ ᤆᤡᤱᤔᤠ ᤔᤧᤗᤧᤛ᤻ᤛᤢ ॥ ᤜᤡᤶᤔᤡᤴ ᤁᤢᤖᤧᤶ ᤒᤫᤠᤱ ᤒᤫᤠᤱ ᤁᤢᤏᤠᤶᤁᤧᤛᤧᤒᤠ ᤜᤡᤀᤣᤔᤠ ᤖᤰ ᤁᤧᤗᤧᤒᤠ ᤔᤡᤕᤱᤒᤠᤛᤡ ॥ ᤀᤠᤶᤔᤠ ᤀᤠᤖᤛᤠᤱ ᤁᤢᤛᤡᤰ ᤐ᤺ᤥᤰᤔᤠ ᤆᤰ ᤔᤧᤎᤧᤏᤧᤴ ॥ ᤂᤢᤏᤧ᤹ ᤀᤠᤖᤛᤠᤱ ᤁᤢᤕᤠᤳ ᤗᤧ᤹ᤔᤠ ᤆᤰ ᤔᤧᤎᤧᤏᤧᤴ ॥  ᤐᤠᤱᤓᤣ᤹ᤀᤥ ᤃ ᤂᤠᤶᤏᤧᤁᤖ ᤂᤠᤶᤔᤥ᤹ ᤔᤧᤗᤢᤵᤋᤢ ॥ ᤕᤠ᤹ ᤔᤣᤕᤠᤱᤄᤢᤏᤧᤁᤖ ᤕᤠ᤹ ᤀᤥ ᤔᤧᤗᤢᤵᤋᤢ ॥ ᤛᤩᤠ ᤔᤧᤕᤠᤱᤄᤢᤏᤧᤁᤖ ᤛᤩᤠᤀᤥ ᤔᤧᤗᤢᤵᤋᤢ ᤁᤖ ᤁᤴ ᤜᤣᤰᤁᤣ ᤜᤡ ᤔᤧᤴᤛᤧᤛᤢᤴ ॥ ᤀᤠᤴᤍᤣᤴᤏᤠᤱᤎᤥ ᤔᤠᤶᤔᤠ ᤛᤠᤖᤡᤰ ᤁᤢᤕᤠ᤺ᤳ ᤗᤧ᤹ᤖᤧᤒᤠ ᤂᤧᤵᤛᤢᤱᤅᤠᤱ ᤀᤠᤱᤃᤠ᤹ ᤕᤧ᤹ᤕᤠᤰᤁᤠᤱ ᤀᤠᤶᤔᤠᤖᤧ ᤁᤢᤒᤣᤛᤠᤰ ᤐᤣᤰᤁᤠᤖ ᤀᤠᤶᤔᤠ ᤗᤧᤔᤢᤱᤗ ᤋᤠ᤹ ᤆᤧᤰᤋᤢᤱ ॥ ᤗ ᤀᤥᤔᤧᤳᤋᤧ ᤀᤠᤔᤥ ᤔᤡᤕᤱᤒᤠᤖᤧ ᤐᤠᤱᤓᤣ᤹ ᤐᤠᤱᤕᤰ ᤁᤧᤗ᤹ᤒᤠ ᤔᤧᤴᤏᤡᤛᤢᤴ ॥ ᤐᤠᤱᤓᤣᤀᤥᤛᤠᤱ ᤐᤠᤜᤣᤰᤁᤧ ᤐᤠᤱᤕᤰᤁᤥᤛᤠᤱ ᤐᤠᤜᤣᤰᤁᤣ ॥ ᤁᤴ ᤜᤡᤁᤣᤀᤣᤒᤠ ᤔᤡᤱᤅᤡᤴᤏᤠᤱ ᤁᤢᤕᤠᤶ ᤋᤢᤃᤣ ᤒᤡ, ᤌᤣ ᤐ᤺ᤥᤰᤂᤣ ᤀᤠᤱ ᤀᤰᤂᤣ ᤋᤖᤢ᤹ᤒᤠ ᤗᤠ᤹ᤒᤠ ॥ ᤔᤧᤴᤏᤧᤁᤖ ᤐᤠᤱᤓᤣ᤹ᤀᤥ ᤛᤠᤱ ᤐᤠᤱᤕᤰᤁᤥᤛᤠᤱ ᤔᤡᤕᤱᤖᤧ ᤜᤢᤴᤇᤡ ᤜᤡ ᤔᤧᤈᤡᤰᤂᤢ/ᤔᤧᤗᤢᤵᤋᤢ ᤀᤣ ॥ ᤔᤡᤕᤱᤃ ᤗᤳᤇᤠᤛᤡ ᤀᤠᤳᤋᤠᤴᤇᤠᤱ ᤔᤡᤕᤱ ᤔᤡᤕᤱᤅᤧ ᤔᤧᤒᤠᤣ᤺ᤱ ᤔᤧᤶᤒᤡ ᤀᤠᤔᤥ ॥ ᤀᤠᤱᤃᤠ᤹ ᤀᤠᤶᤔᤠ ᤋᤠ᤹ᤆᤧᤰᤋᤢᤱ ॥ ᤕᤠᤶᤔᤥ ᤀᤠᤶᤔᤠ ᤐᤠᤖᤧ ॥ ᤔᤧ᤺ᤴ ᤑᤥ᤹ᤒᤣ, ᤐᤠᤱᤕᤰᤐᤠ ᤔᤡᤕᤱ ᤔᤡᤛᤠᤰ ᤘᤣ᤹ᤀᤣ ᤔᤧᤈ᤺ᤥᤰ ॥ ᤀᤥᤔᤧᤳᤋᤧ ᤕ᤹ ᥄ ᤁᤢᤜᤡᤴ ᤀᤠᤰᤂᤣᤍᤶᤒᤠ ᤆᤠᤣ᤺ᤰ ᥅ ᤀᤠᤱᤃᤠ᤹ ᤀᤠᤏᤡᤱᤘᤠ ᤛᤡᤃᤠᤱ ᤀᤡᤳᤇᤡᤱᤅᤠᤱ ॥ ᤐᤠᤱᤕᤰᤁᤥᤒᤠ ᤔᤧᤕᤱᤜᤠ᤹ ᤘᤣ᤹ ᤁᤧᤈᤥᤰᤐᤠ ᤐᤠᤀᤠᤏᤡ᤹ ᤕᤠᤵᤔᤡᤜᤠ᤹ ᤖᤥ ॥ ᤀᤠᤒᤠᤱᤅᤣ ᤛᤠᤏ᤺ᤠᤳ ᤁᤣᤛᤧᤵᤐᤠ ᤁᤧᤈᤠᤒᤠ ᤔᤡᤕᤱᤜᤠ᤹ ᤂᤠᤩᤠᤒᤠᤜᤠ᤹ ᤐᤠᤱᤅᤰᤁᤥ ᤐᤡᤳᤏᤢ, ᤛᤠ, ᤂᤢᤩ ᤏᤢ ᤋ᤺ᤰ ᤀᤠᤒᤡ᤹ᤖᤢᤶᤛᤡᤶ ॥ ᤜᤧᤰᤁᤩᤠᤱ ᤜᤡᤔᤧᤓᤡᤋᤢᤛᤡᤴᤏᤠᤱ ᤌᤣ ᤐᤠᤣ᤺ᤱ ᥅ ᤁᤴᤓᤖᤡᤰᤗᤰ ᤔᤧ᤺ᤴ ᤁᤡᤵᤛ᤻ᤆᤡᤵᤛ᤻ ᤔᤢ ᤍᤪᤢᤸᤛ᤻ ᤔᤢ ᤌᤧ ᤜᤠ᤹ ᤀᤡ ᤌᤣ ᤜᤠ᤹ ᤀᤠᤀᤡᤅᤢᤶ ᤀᤠᤒᤡᤖᤢᤶᤛᤡᤶ ॥ ᤀᤠᤒᤠᤱᤅᤣ ᤀᤡᤶᤔᤠᤍᤧᤴᤏᤥ ᤔᤡᤕᤒᤱᤜᤠ᤹ ᤂᤩᤠᤒᤠᤜᤠ᤹ ᤁᤧᤀᤡᤵᤐᤠ ᤐᤠᤀᤠᤏᤡ ॥ ᤀᤠᤒᤠᤱᤅᤣ ᤆᤠᤔᤠ ᤆᤧᤌᤩᤠᤀᤥ ᤔᤡᤕᤱᤜᤠ᤹ ᤂᤩᤠᤒᤠᤜᤠ᤹ ᤋ᤺ᤰ ᤁᤧᤒᤡᤒᤠ ᤐᤠ ᤀᤠᤏᤡ᤹ ॥ ᤜᤧᤰᤁᤩᤠᤱ ᤀᤠᤰᤂᤣᤏᤢ ᤔᤡᤕᤱᤗᤧ ᤜᤢᤴᤇᤡ᤹ ᤜᤡ ᤔᤧᤗᤢᤵᤋᤢ/ᤔᤧᤈᤡᤰᤂᤢᤒᤣ ᥅ ᤀᤠᤰᤂᤣᤏᤢᤔᤢ ᤜᤢᤴᤇᤡ᤹ ᤜᤡ ᤏᤠᤶᤔᤧᤛᤢᤏᤧᤴᤒᤣ ᥅   
    

    ᤀᤢᤴᤇᤠᤣ᤺ᤴᤒᤠ ᤌᤒᤠ᤹ ᤕᤢᤔᤠ᤹ᤖᤧ ᤐᤠᤱᤂᤧᤍᤠ᤹ ᤔᤧᤈᤧᤰᤂᤢ ॥ ᤁᤣᤒᤠᤸᤗᤧ ᤛᤠᤏᤠ᤺ᤳ (ᤛᤡᤁᤠᤷ) ᤆ᤺ᤥᤰᤔᤠ ᤔᤧᤴᤗᤧᤀᤣ ᤘᤕᤣᤔᤢ ॥ ᤁᤣᤒᤠᤴ ᤔᤡᤕᤱᤒᤠᤴᤏᤢ ᤛᤠᤏᤠ᤺ᤳ ᤆᤠᤣ᤺ᤰᤔᤠ ᤜᤢ᤹ᤛᤡᤱ ᤐᤣᤔᤢ ॥ ᤜᤣ᤹ᤏᤢ  ᤔᤡᤕᤱᤒᤠᤸᤗᤧ ᤁᤣᤒᤠᤴ ᤛᤠᤏᤠ᤺ᤳ ᤆᤠᤣ᤺ᤰᤔᤠ ᤜᤢ᤹ᤖᤢᤖ ᤋᤣ᤹ᤖᤢᤔᤢ ॥ ᤜᤢ᤹ᤖᤢᤖ ᤋᤣ᤹ᤖᤢᤸᤗᤧ ᤋᤠ᤺ᤴᤍᤡ ᤁᤣᤒᤠᤴᤏᤠᤱ ᤔᤠᤵᤔᤠ ᤁᤣᤗᤧᤒᤠ ᤐᤥᤰᤂᤧᤖᤧᤳᤇ ॥ ᤌᤡᤰᤕᤣᤴᤃ ᤁᤣᤒᤠᤸᤗᤧ ᤔᤡᤕᤱᤒᤠᤴ ᤀᤠᤸᤗ ᤀᤠᤱᤃᤠ᤹ ᤁᤧᤖᤧᤰ ᤗᤧᤛ᤻ᤛᤢᤱ ᤀᤠᤖ ᤀᤠᤱᤃᤠ᤹ ᤐᤠᤜᤧᤏᤣ᤹ ᤆᤠᤏᤧ ᤔᤣᤳᤋᤢᤖᤧᤳᤇ ॥ ᤔᤡᤕᤱᤒᤠᤸᤗᤧ ᤁᤣᤒᤠᤴ ᤛᤡᤱᤒᤢᤱ ᤗᤡᤱᤔᤠ ᤔᤧᤴᤜᤢ᤹ᤀᤣ ᤘᤕᤣᤖᤧᤳᤇ ॥ ᤔᤡᤕᤱᤒᤠᤴ ᤐᤡᤳᤆᤠᤰ ᤐᤡᤴᤍᤧ ᤐᤣᤀᤠᤱ ᤛᤡᤱᤒᤢᤱᤔᤥ᤹ᤎᤥ ᤗᤠᤛᤣ ᤖᤧᤳᤇ ॥ ᤜᤣ᤹ᤏᤢᤏᤧ ᤁᤣᤒᤠᤸᤗᤧ ᤛᤡᤱᤒᤢᤱ ᤗᤡᤱᤔᤠ ᤔᤧᤴᤜᤢ᤹ᤛᤡᤱᤅᤣ ᤘᤕᤣᤒᤠ ᤌᤠᤀᤡᤱ ᤆᤥᤃᤢ ॥ ᤜᤣ᤹ᤏᤢ ᤁᤣᤒᤠᤸᤗᤧ ᤔᤡᤕᤱᤒᤠᤴ ᤔᤧᤳᤋᤢᤔᤢ ᤀᤠᤳᤋᤠᤴᤇᤧ ᤁᤧᤄᤣᤳᤇᤡᤱᤒᤣ ᤀᤠᤱᤃᤠ᤹ ᤁᤣᤜᤡᤴ ᤏᤠᤶᤛᤢᤱᤅᤠᤱᤛᤠᤱ ᤋᤧᤶᤏᤧᤀᤠᤱ ᤆᤠᤏᤧ ॥ ᤕᤠᤶᤔᤥ ᤔᤡᤕᤱᤒᤠᤴ ᤛᤡᤱᤈᤱᤎᤥ᤹ ᤁᤥᤛᤢᤀᤠᤱ ᤁᤣᤒᤠᤴ ᤀᤡᤳᤌᤥᤘᤠ ᤗᤥᤀᤡ ᤕᤢᤱᤅᤣᤸᤗᤧ ᤔᤡᤕᤱᤒᤠᤴ ᤘᤣ᤹ ᤗᤧᤶᤈᤠᤱᤏᤢ ᤐᤡᤳᤆᤠᤰ ᤐᤡᤴᤍᤧ ᤗᤴᤍᤣᤀᤠᤱ ᤂᤧᤳᤇᤡᤅᤠ ᤐᤣ ᤖᤧᤳᤇ ॥ ᤜᤣᤴᤏᤠᤱ ᤁᤳᤏᤠ ᤁᤣᤒᤠᤸᤗᤧ ᤋᤧᤶᤔᤠᤀᤠᤱ ᤛᤧᤳᤋᤠ᤹ᤓᤠᤀᤠᤱ ᤔᤡᤕᤱᤒᤠᤸᤗᤧ ᤁᤢᤜᤡ ᤀᤠᤳᤋᤠᤴᤇᤠᤱ ᤆᤡᤰᤂᤢ/ᤗᤢᤵᤋᤢᤒᤠᤔᤢ ॥ ᤁᤖ ᤁᤴ ᤗᤳᤌᤡᤰ ᤐᤠᤱᤂᤧᤍᤠᤖᤰ ॥ ᤁᤴ ᤌᤣᤒᤠ᤹ ᤕᤢᤔᤠᤖᤧ ᤜᤢᤴᤇᤡ ᤐᤠ᤺ᤴ ॥ ᤏᤡᤛᤣᤀᤡ ᤜᤏᤧᤀᤡ ᤀᤠᤒᤠᤱᤅᤣ ᤁᤢᤍᤧᤴᤀᤥ ᤘᤠ ॥ ᤁᤖ ᤛᤧᤰᤂᤠᤒᤠ ᤐᤠ᤺ᤴ ᤌᤣ ᤘᤠᤓᤧᤸᤗᤧ ᤔᤡᤕᤱᤖᤧ ᤜᤢᤴᤇᤡ᤹ ᤜᤡ  ᤀᤠᤳᤋᤠᤴᤇᤠᤱ ᤔᤧᤗᤢᤵᤋᤢ/ᤔᤣᤈᤡᤰᤂᤢ ॥ 
    ᤔᤡᤕᤱᤒᤠᤸᤗᤧ ᤌᤩᤠᤱ ᤁᤢᤜᤡᤴ ᤆᤡᤰᤂᤢ ᥅ ᤌᤩᤠᤱ ᤔᤧᤈᤡᤰᤂᤢᤴ ᥅ ᤁᤧᤗ᤹ᤒᤠ ᤐᤠ᤺ᤴᤀᤥ ᤈᤣᤛᤡᤁᤠ ᤆᤠᤷ (ᤫᤓᤁᤁᤅᤀᤒ ᤹ᤈᤒᤆ) ᤏᤢ ᤈᤥᤏᤠᤌᤴ  ᤑᤢᤴᤋᤧᤛ᤻ (ᤫᤕᤈᤗᤒᤋᤈᤒᤗ ᤖᤃᤓᤗᤋᤓᤁ) ᤖᤧ ᤘᤡᤁᤡᤜᤠᤀᤢ ᤍᤳ ᤁᤶ (ᤎᤅᤐᤅᤈᤕᤎ॥ᤀᤕᤑ) ᤀᤥ ᤛᤠᤵᤋᤧᤳᤇᤢᤀᤠᤱ ᤐᤳ - "ᤔᤡᤕᤱᤒᤠᤜᤠᤖᤧ ᤀᤠᤵᤆᤠᤖᤠᤜᤠ᤹ᤀᤥᤏᤢ ᤜᤢᤴᤇᤡ ᤆᤳᤇᤡᤱᤔᤠ ᤑᤠ᤹ᤀᤠᤱ ᤏᤢ ᤀᤠᤒᤠᤱᤅᤧ ᤋᤧᤴ (ᤇᤧᤋᤪ) ᤘᤣ᤹ ᤔᤡᤕᤱᤒᤠᤜᤠ᤹ᤏᤢ ᤌᤰᤔᤠᤀᤥᤏᤢ ᤂᤧᤵᤔᤠ ᤑᤠ᤹ᤀᤠᤱ ᤜᤢᤴᤇᤡ᤹ ᤜᤡᤴ ᤔᤧᤈᤡᤰᤂᤢ ॥ ᤁᤴ ᤗᤧᤵᤕᤧ᤺ᤵ (ᤒᤠᤏᤡ) ᤋᤠᤶᤓᤢᤱ ᤔᤧᤕᤱᤀᤥ (ᤈᤱᤃᤗᤡ ᤒᤡᤖᤠᤗᤥ) ᤗᤠᤶ ᤏᤢ ᤁᤢᤔᤢᤰᤁᤢᤎᤠᤶ (ᤀᤢᤳᤐᤋᤡ) ᤐᤠᤣ᤺ᤰᤂᤣ ᤕᤣᤒᤠ ॥ ᤔᤡᤕᤱᤒᤠᤜᤠ᤹ᤖᤧ ᤀᤠᤑᤠᤸᤗᤧ ᤀᤠᤑᤠᤸᤗᤧ ᤜᤢᤴᤇᤡ ᤜᤡᤴ ᤔᤧᤴᤈᤡᤰᤂᤢᤴ ॥ ᤌᤣᤀᤠᤱᤓᤠᤳᤗᤧ ᤜᤢᤴᤇᤡ ᤀᤠᤒᤠ᤺ᤱᤅᤣ ᤔᤣᤕᤢᤰᤋᤢᤒᤠ ᤋᤧᤴ ᤂᤢᤴᤇᤡ ᤂᤠᤶ ᤔᤡᤰᤛᤣ᤺ᤴ ᤐᤥᤱᤗ ᤑᤠ᤹ᤀᤠᤱ ॥ ᤔᤡᤕᤱᤒᤠᤖᤧ ᤜᤢᤴᤇᤡ ᤜᤡ ᤘᤣ᤹ ᤁᤢᤏᤠᤶᤛᤣ ᤜᤣᤰᤁᤩᤠᤱ ᤘᤣ᤹ ᤔᤡᤕᤱᤒᤠᤖᤧ ᤀᤢᤛᤢᤖᤢ ᤜᤧᤴ ᤌᤠᤀᤡᤱ ᤔᤧᤈᤥᤃᤢ ॥'' (ᤆᤠᤷ, ᤑᤢᤴᤋᤧᤛ, ᤎᤅᤐᤅᤈᤕᤎ॥ᤀᤕᤑ/>ᤓᤔᤗᤓᤁᤔᤒᤌ, ᤺ᤒᤌ ᥍, ᥈᥆᥈᥋)    ᤀᤰᤂᤣᤗ᤹ᤖᤡᤰ ᤘᤣ᤹ ᤔᤡᤕᤱᤒᤠᤖᤧ ᤘᤣ᤹ ᤔᤧᤕᤱᤒᤠᤖᤧ ᤂᤢᤴᤇᤡ᤹ ᤋᤧᤴ ᤌᤠᤀᤡᤱ ᤔᤧᤈᤥᤃᤢ ॥ ᤔᤡᤕᤱᤒᤠᤖᤧ ᤜᤢᤴᤇᤡ᤹ ᤜᤡ ᤆᤡᤱᤔᤠᤖᤧ ᤛᤠᤵᤆᤠᤏᤠᤀᤡᤒᤠ ᤂᤧᤀᤡᤱ (ᤒᤤᤃᤩᤠᤏᤡᤰ ᤁᤠᤖᤴ) ᤀᤰᤂᤣᤍᤶᤒᤠ ᤘᤠᤒᤠᤖᤧᤳᤇ ॥  ᤀᤰᤂᤣᤖᤡᤰ ᤔᤡᤕᤱᤒᤠᤖᤧ ᤜᤢᤴᤇᤡ᤹ ᤜᤡ ᤆᤡᤱᤔᤠᤠᤠᤖᤧ ᤌᤡᤶ ᤐᤠᤣ᤺ᤰᤂᤧ ᤕᤧᤒᤠ ᤏᤡᤍᤧᤳ ॥ 
    ᤂᤛ᤻ ᤐᤧᤏᤣ ᤛᤱᤈᤢᤶᤔᤥ ᤔᤡᤕᤱᤒᤠᤸᤗᤧ ᤗᤠᤶ ᤂᤰᤋᤢᤸᤗᤧ ᤋᤠᤑᤧ᤺ᤶᤒᤠ ᤐᤠᤣ᤺ᤱ ᤁᤧᤗ᤹ᤒᤠ ᤐᤠ᤺ᤴ ᤂᤧᤶᤍᤧᤳ ॥ ᤀᤡ᤺ᤵᤏᤠᤒᤠ ᤂᤠᤵᤏᤠᤒᤠ ᤔᤧᤃᤧᤳᤋᤡᤴ ᤔᤧᤗ᤹ ॥ ᤁᤴ ᤏᤡᤱᤛᤠᤱᤗᤧ ᤕᤠᤵᤔᤡ ᤁᤴᤎᤠᤖᤡᤰ ᤋᤢᤰᤂᤣ ᤆᤠ᤺ᤳᤋᤢᤛᤡᤒᤠ ᤏᤡᤍᤧᤳ ᤀᤠᤰᤂᤧ᤺ᤴ ᤕᤣᤶ ᤃ ᤗᤠᤶᤔᤥ ᤔᤡᤕᤱᤒᤠᤸᤗᤧ ᤗᤠᤶ ᤂᤰᤋᤢᤑᤠ᤹ᤀᤠᤱ ᤗᤠᤶᤔᤣ ᤁᤧᤗᤧᤵᤐᤠᤠᤀᤠᤱ ᤘᤣ᤹ ᤗᤠᤶ ᤁᤧᤒᤣ᤺ᤰᤐᤠ ᤜᤠᤔᤣᤪᤰᤐᤠ ᤕᤠᤵᤔᤡᤀᤠᤱ ᤗᤠᤶ ᤗᤠᤶ ᤏᤡᤔᤧᤍᤧᤳ ॥ ᤕᤠ᤺ᤶᤒᤰᤁᤣ ᤁᤧᤗᤧᤵᤐᤠᤀᤠᤱ ᤏᤡ᤺ᤔᤣᤍᤧᤳ ॥ ᤀᤠᤰᤂᤣᤴ ᤕᤣᤶ ᤕᤠᤵᤔᤡᤜᤠ᤹ ᤗᤠ᤺ᤶᤔᤡᤸᤗᤧ ᤁᤢᤖᤢᤶᤔᤥ ᤗᤠᤎᤠᤀᤣ ᤆᤡᤛᤠᤰ ᤔᤣᤕᤧᤵᤛᤢᤀᤠᤱ ᤔᤣᤕᤧᤵᤐᤠᤀᤠᤱ ᤏᤡᤍᤧᤳ ॥ ᤁᤴᤓᤖᤡᤰᤗᤰ ᤔᤧ᤺ᤴ ᤁᤢᤜᤣᤳᤗᤠᤒᤠ ᤋᤪᤠᤑᤡᤰ ᤛᤠ᤺ᤶᤓᤣ  ᤀᤥᤳᤋᤡᤸᤗᤧ ᤗᤠᤎᤠ ᤔᤧᤴᤕᤧᤶᤏᤠᤒᤠ ᤕᤠᤵᤔᤡᤜᤠ᤹ ᤔᤡᤕᤱᤒᤠᤸᤗᤧ ᤗᤠᤶ ᤂᤰᤋᤢᤸᤗᤧ ᤗᤠᤎᤠ ᤔᤧᤕᤣᤵᤛᤢᤒᤠ ᤜᤠᤔᤪᤣᤰᤐᤠ ᤜᤡᤴᤎᤠᤣ᤺ᤰᤂᤠ᤹ ᤏᤡᤍᤧᤳ ᤀᤠᤏᤡ᤹ ᤛᤱᤈᤢᤶᤔᤥ᤹ ॥ ᤜᤣᤰᤁᤣᤃ ᤁᤴ ᤌᤡᤶᤔᤡᤴ ᤁᤧᤀᤢᤱᤒᤠ ᤁᤧᤕᤢ᤺ᤵᤐᤠ ᤏᤡᤱᤘᤠ ᤁᤧᤀᤢᤱᤒᤠ ᤛᤠᤵᤔᤢᤴᤎᤢᤶᤔᤡᤒᤠ ᤛᤎᤠᤛᤡᤱ ᤘᤠ ॥ ᤁᤴ ᤌᤣᤔᤠ ᤘᤠ ᤑᤠ᤹ᤗᤧ ᤗᤢᤶ ᤐ᤺ᤸᤗᤠᤒᤠ ᤕᤧᤶᤔᤥ (ᤑᤓᤔᤅᤓᤂᤒᤡ ᤒᤏᤓᤁ) ᤗᤠᤎᤠ ᤑᤃᤖ ᤐᤰᤐᤡᤳᤗᤧ ᤛᤠᤱᤘᤧᤳᤗᤧ ᤔᤧᤀᤢᤰᤂᤢᤒᤠ ᤏᤡᤃᤵᤗᤠᤣ᤺ᤰ (ᤍᤢᤀᤡ ᤆᤰᤁᤧ) ᤗᤰ ᤘᤕᤧ ॥ ᤜᤧᤴ ᤕᤧᤶ ᤗᤠᤶᤔᤥ ᤔᤡᤕᤱᤒᤠ ᤕᤠ ᤜᤣᤰᤁᤣᤍᤶᤒᤠ ᤌᤰᤛᤠ ᤐᤰᤐᤡᤳᤗᤧ, ᤛᤠᤱᤘᤧᤳᤗᤧ ᤔᤧᤏᤡᤛᤢᤛᤡᤸᤗᤧ ᤔᤧᤓᤳᤋᤢᤛᤡᤒᤠ ॥ ᤌᤡᤰᤗᤧᤱᤔᤠᤸᤗᤧ ᤔᤧᤏᤡᤛᤢᤛᤡᤸᤗᤧ ᤐᤰᤐᤡᤳ, ᤛᤠᤱᤘᤣᤳ ᤕᤱᤔᤠ᤹ ᤔᤧᤛᤡᤒᤠ ᤔᤧᤗᤥᤰᤐᤠ ॥ ᤜᤣ᤹ᤏᤢ ᤏᤡᤃᤵᤗᤠᤣ᤺ᤰ ᤁᤧᤕᤢᤰᤐᤠ ᤕᤠᤶᤔᤡᤜᤠ᤹ ᤔᤧᤃᤧᤱᤒᤠ ᤔᤧᤃᤠᤴᤒᤠᤸᤗᤧ ᤆᤥᤃᤢᤸᤗ ᤛᤵᤑᤠ᤹ ᤕᤧᤵᤛᤡᤱᤔᤠᤀᤠᤱᤗᤰ ᤗᤠᤶᤗᤥᤔᤠ ᤌᤡᤶ ᤐᤠᤣ᤺ᤰᤂᤣ ॥ ᤋᤠ᤺ᤴᤍᤡ ᤁᤴᤏᤧ ᤀᤰᤂᤣ ᤐᤠᤣ᤺ᤰᤂᤣᤖ ᤕᤧ ᤒᤠ ᤏᤡᤍᤧᤳ/ᤂᤧᤶᤍᤧᤳ ॥  ᤜᤣᤰᤁᤣᤃ ᤔᤡᤕᤱᤒᤠᤏᤢᤢ ᤁᤣᤃᤡᤒᤠ ᤀᤠᤏᤡ᤹ᤖᤰ ᤔᤧ᤺ᤴ ॥ ᤕᤖᤡᤰ ᤕᤢᤖᤥᤐᤡᤕᤴᤜᤠ᤹ ᤀᤠᤱ ᤔᤠᤰᤁᤪᤒᤠ ᤔᤡᤕᤱᤒᤠᤸᤗᤧ ᤗᤠᤶ ᤂᤰᤋᤢᤸᤗᤧ ᤏᤠᤶᤓᤧᤖᤠ ᤐᤥᤱᤒᤠ ᤔᤧᤀᤡᤳᤋᤢ ॥ ''ᤕᤖᤡᤰᤋᤱᤒᤠ ᤕᤢᤖᤥᤵᤀᤥ ᤁᤢᤔᤰᤗᤠᤒᤠ ᤔᤡᤕᤱᤒᤠᤴ ᤏᤠᤶᤓᤧᤖᤠᤖᤧ ᤆᤡᤒᤣ (ᤛᤱᤁᤣᤳ) ᤔᤣᤔᤣᤳᤋᤢ ॥ ᤀᤠᤖᤛᤠᤱ ᤕᤠᤵᤔᤡᤖᤧ ᤗᤠᤶᤗᤥᤒᤠ ᤗᤠᤶᤔᤥ ᤗᤠᤱᤄᤣ᤺ᤰᤏᤣᤁᤖ ᤜᤧᤴ ᤏᤠᤶᤓᤧᤖᤠ ᤏᤢ ᤔᤠᤛᤡᤱᤔᤠ ᤛᤡᤔᤠᤔᤠᤖᤧ ᤆᤡᤒᤣ ᤔᤧᤔᤧᤳᤋᤢ ॥ ᤐᤠᤱᤔᤢᤴᤎᤢᤶᤀᤥ ᤁᤴ ᤛᤡᤕᤠ᤹ᤔᤠ (ᤒᤥᤰᤛᤡ) ᤕᤠ ᤜᤥᤖᤢ (ᤖᤠᤰᤇᤩᤛ) ᤖᤧ ᤁᤢᤀᤡᤱᤄᤱᤛᤠ ᤔᤧᤔᤧᤳᤋᤢ ॥'' (ᤈᤋᤋᤇᤁ://ᤓᤗ॥ᤎᤅᤐᤅᤇᤓᤔᤅᤒ॥ᤕᤆᤏ/>ᤓᤔᤗᤓᤁᤔᤒᤌ, ᤺ᤒᤌ ᥍, ᥈᥆᥈᥋) ᤜᤣᤰᤁᤣᤃ ᤀᤠᤕᤷᤗᤧᤴᤍ, ᤒᤣᤗᤠᤕᤳ ᤜᤣᤰᤁᤣᤍᤶᤒᤠ ᤀᤠᤰᤂᤣᤴ ᤗᤠᤈᤣ᤹ᤜᤠ᤹ᤀᤥ ᤁᤴ ᤏᤢᤒᤠ ᤆᤡᤒᤣ ᤗ᤹ᤖᤡᤰᤁᤠᤱ ᤔᤧᤀᤡᤳᤋᤢ ॥ 
     

     ᤛᤱᤁᤷ ᤗᤠᤔᤡᤇᤠᤏᤧ ᤆᤢ᤺ᤰᤋᤧᤸᤗᤧᤀᤠᤱᤎᤥᤛᤠ ᤂᤩᤠᤒᤠ, ᤔᤡᤕᤱᤒᤠ, ᤐᤡᤳ, ᤀᤴ ᤀᤰᤂᤣᤍᤶᤒᤠ ᤐᤖᤡᤰ ᤐᤖᤡᤰᤐᤠ ᤌᤠᤔᤡᤱᤀᤥ ᤛᤢᤶᤈᤥ ᤛᤠᤵᤋᤢᤖᤀᤣ ᤘᤕᤣᤒᤠ ᤐᤠ᤺ᤴ ᤌᤥᤒᤠ ᤛᤢᤶᤈᤥᤀᤥᤀᤣ ᤛᤠᤵᤋᤢᤀᤠᤱ ᤐᤳ ॥ ᤁᤖ ᤔᤡᤅᤱᤒᤠᤖᤧ ᤁᤴ ᤜᤣᤰᤁᤣᤍᤶᤒᤠ ᤁᤢᤗᤧᤵᤕᤧ᤺ᤵᤑᤠ᤹ (ᤒᤠᤏᤡᤜᤖᤢ) ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤘᤕᤣᤔᤢ ᤜᤧᤁᤩᤠᤱ ᤛᤢᤶᤈᤥᤜᤠ᤹ᤀᤥ ᤔᤧᤴᤛᤠᤵᤐᤣᤀᤠᤱ ᤘᤕᤣᤔᤢ ॥ ᤔᤡᤕᤱᤒᤠᤖᤧ ᤗᤡᤛᤡ ᤁᤢᤗᤠᤱ ᤔᤧᤒᤳ  ॥ ᤁᤣ᤺ᤶᤒᤠ ᤁᤢᤔᤡ ᤐᤳ ॥ ᤗ᤹ᤖᤡᤰ ᤗᤰ ᤛᤢᤶᤈᤥ ᤛᤠᤵᤋᤢᤖ ᤘᤕᤣᤔᤢ ॥ ᤐᤡᤳ ᤌᤠᤔᤡᤱᤒᤠ ᤛᤢᤶᤈᤥ ᤛᤠᤵᤔᤠᤸᤗᤧ ᤐᤡᤳ ᤀᤠᤏᤡ ᤀᤠᤜᤡᤱᤄᤢᤶ ॥ ᤂᤧᤸᤗᤧ ᤗᤡᤛᤡ ᤁᤢᤗᤠᤱ ᤔᤧᤒᤳ ॥ ᤏᤧᤳᤇᤡ ᤁᤢᤍᤠᤱ ᤔᤧᤒᤳ ᤁᤧᤗ᤹ᤒᤠ ᤖᤰ ᤀᤠᤏᤡ᤹ ᤜᤡᤴᤈᤠ᤹ᤜᤠ᤹ ᤀᤠᤜᤢᤖᤢᤶᤛᤡᤶᤗ ᤀᤠᤘᤠ ᤖᤧᤳᤇ ॥ ᤁᤴ ᤀᤡᤛᤡᤰᤐᤠᤖᤰ ᤏᤡᤛᤠᤶ ᤜᤢ᤹ᤔᤢᤏᤧᤳ ᤆ᤺ᤥᤰᤔᤠᤖ ᤐᤣ᤺ᤰᤔᤠᤸᤗᤧ ᤀᤠᤏᤡ᤹ ᤀᤠᤳᤋᤡ ᤀᤠᤃᤧᤳ ᤁᤧᤗ᤹ᤒᤠ ᤛᤣ᤺ᤴᤍᤥ ᤑᤠᤣ᤺ᤰᤂᤢᤀᤠᤱ ᤐᤳ ᤗᤠᤔᤡᤇᤠᤏᤧᤖᤧ ᤁᤩᤠᤳ ᤔᤠᤏᤧ ᤒᤡᤖᤠᤗᤥ ᤛᤢᤶᤈᤥᤀᤥ ॥ ᤀᤠᤖ ᤀᤠᤸᤗᤥᤒᤠ ᤂᤩᤠᤒᤠ ᤔᤡᤕᤱᤒᤠᤃ ᤁᤩᤠᤳ ᤔᤠᤏᤧ ᤒᤡᤖᤠᤗᤥᤏᤢᤸᤗᤧᤛᤠᤱ ᤁᤥᤕᤧᤶᤒᤠ ᤔᤧᤒᤥᤂᤧ ᤖᤧᤳᤇ ॥ ᤜᤧᤰᤁᤩᤠᤱᤏᤧ ᤜᤡᤒᤡᤳᤋᤢᤛᤡᤛᤠᤱ ᤜᤡᤶᤂᤡᤖᤡ ᤂᤡᤖᤡ ᤔᤧᤜᤡᤖ ᤜᤡᤔᤧᤀᤣ ᤖᤧᤳᤇ ॥ ᤜᤣ᤹ᤏᤢ ᤀᤠᤶᤔᤠ ᤋᤠ᤺ᤴᤇᤥᤌᤵᤔᤠ ᤁᤢᤛᤡᤰ ᤐᤠᤣ᤺ᤰᤗ ᤜᤡᤋᤢᤰᤁᤡ ᤕᤠᤰᤐᤠ ᤏᤡᤛᤢᤱ ॥ ᤜᤣ᤹ᤏᤢ ᤀᤡ᤺ᤳᤇᤡᤱᤅᤠ ᤔᤧ᤺ᤴᤒᤣ ᤁᤴ ᤂᤩᤠᤒᤠ ᤔᤡᤕᤱᤒᤠᤜᤠ᤹ ᤁᤥᤕᤣᤶᤒᤠ ᤔᤧᤒᤥᤂᤧᤒᤠᤒᤡ ᤀᤠᤏᤡ᤹ ᤏᤠᤶᤕᤠᤵᤔᤡᤜᤠ᤹ ᤁᤥᤕᤧᤶᤒᤠ ᤀᤠᤒᤠᤣ᤺ᤰᤂᤧᤒᤠ ᤒᤡ ᥅ ᤀᤠᤏᤡᤱᤘᤠ᤹ᤒᤥ ᤛᤣ᤺ᤴᤍᤥ ᤐᤠᤣ᤺ᤰ ॥  ᤜᤣ᤹ᤏᤢ ᤕᤠᤶᤔᤥ ᤀᤠᤶᤔᤠᤖᤧ ᤁᤢᤒᤠ᤺ᤴᤜᤠ᤹ ᤀᤠᤏᤡᤱᤘᤠ᤹ᤖᤧ ᤌᤠᤵᤋᤢᤛᤡ ॥ "ᤐᤠᤱᤕᤰᤁᤥᤒᤠ ᤔᤡᤕᤱᤒᤠᤖᤧ ᤛᤢᤒᤠ᤹ ᤔᤧᤴᤍᤧᤶᤛᤢᤴ" ॥ ᤜᤣ᤹ᤏᤢ ᤀᤡ᤺ᤳᤇᤡᤱᤅᤠ᤹ ॥ ᤀᤠᤶᤔᤠᤖᤧ ᤁᤢᤒᤠ᤺ᤴ ᤛᤧᤰᤂᤠ ᤖᤧᤳᤇ ॥ ᤜᤣᤰᤁᤩᤠᤱ ᤐᤠᤱᤕᤰᤁᤥ᤹ ᤕᤠᤵᤔᤡᤖᤧ ᤔᤡᤕᤱᤒᤠ ᤛᤠ ᤏᤢ ᤋ᤺ᤰ, ᤂᤢᤩ ᤏᤢ ᤋ᤺ᤰ ᤔᤧᤒᤡᤖᤢᤛᤡᤀᤠᤱ ᤕᤠᤵᤔᤡᤏᤢ ᤛᤥᤖᤡᤰ ᤐᤃᤥ ᤁᤥᤖ ᤕᤢᤰᤏᤠᤀᤥ ᤔᤧᤀᤡ᤺ᤵᤋᤢᤛᤡ ॥ ᤜᤣ᤹ᤏᤢ ᤀᤠᤳᤋᤠᤴᤏᤢ ᤛᤢᤒᤠ᤹ ᤔᤣᤛᤧᤖᤢᤛᤡᤒᤧ ᤔᤡᤕᤱᤒᤠᤖᤧᤀᤠ ᥅ ᤕᤠᤶᤔᤥ ᤔᤡᤵᤔᤠᤒᤠ ᤛᤠ ᤋ᤺ᤰ, ᤂᤢᤩ ᤋ᤺ᤰᤗᤧ ᤜᤡᤒᤡᤳᤋᤢᤛᤡᤀᤠᤱ ᤕᤠᤰᤑᤠᤴ ᤁᤢᤖᤧᤶ ᤜᤡᤔᤣᤀᤧᤳᤋᤢ ᤀᤠᤶᤒᤡ ॥ ᤑᤡᤸᤗᤡᤱ ᤕᤠᤖᤡᤰ ᤁᤧᤗᤧᤰᤐᤠ ᤔᤠᤷᤒᤸ ᤗᤢᤱᤅᤡᤴ ᤑᤧᤏᤠᤒᤠ ᤜᤡᤶᤔᤥᤖᤰ ᤐᤱᤔᤠᤏᤠᤒᤠ ᤁᤳᤏᤠᤒᤠ ᤔᤡᤅᤱᤒᤠᤖᤧ ᤜᤡ ᤆᤡᤱᤔᤠ/ᤗᤢᤵᤔᤠ ᤃ ᤔᤧᤗᤧᤛᤢᤒᤔ ᤐᤠ᤺ᤴᤏᤣ ᤔᤧᤒᤠᤣ᤺ᤰᤂᤧᤴ ॥ ᤜᤣᤰᤁᤩᤠᤱ ᤀᤠᤳᤋᤠᤴᤏᤢ ᤔᤡᤕᤱᤒᤠᤸᤗᤧ ᤁᤢᤜᤡ ᤆᤡᤰᤂᤢᤒᤣ ᥅ ᤕᤠᤶᤔᤥ ᤕᤠᤶᤔᤡᤜᤠ᤹ ᤜᤡ ᤋᤢᤰ ᤀᤠᤒᤠᤱ ॥ ᤁᤖ ᤁᤴ ᤔᤡᤕᤱᤒᤠ ᤁᤥᤕᤧᤶᤒᤠ ᤐᤠᤣ᤺ᤰᤂᤧᤒᤠ ᤔᤧ᤺ᤴ ॥ ᤀᤠᤏᤡ᤹ ᤏᤠᤶᤕᤠᤵᤔᤡᤜᤠ᤹ ᤁᤥᤕᤧᤶᤒᤠ ᤀᤠᤒᤥᤂᤧᤒᤠ ॥  ᤜᤡᤶᤑᤡᤖᤡ ᤑᤡᤖᤡ ᤁᤧᤘᤠᤒᤠᤖ ᤀᤠᤏᤡ᤹ ᤜᤡᤶᤔᤡᤴ ᤋᤠᤱᤛᤧ᤺ᤵ ᤁᤧᤔᤧᤵᤐᤠ ᤂᤩᤠᤒᤠᤜᤠ᤹ ᤀᤠᤏᤡ᤹ ᤕᤠᤰᤑᤠᤛᤡᤃᤠᤱ ᤕᤢᤰᤏᤠᤀᤥ ᤋᤠᤱᤛᤧ᤺ᤵ ᤀᤠᤔᤧᤳᤋᤢᤶᤛᤡᤶᤔᤠᤱ ᤀᤠᤳᤋᤡᤏᤢ ᤁᤧᤄᤢᤶᤒᤠ ᤔᤧᤜ᤹ᤖᤢᤛᤡᤒᤣ ᥅ ᤕᤠᤶᤔᤥ ᤁᤧᤄᤢᤶᤒᤠᤖᤧ ᤏᤧ ᤂᤩᤠᤒᤠ ᤔᤧᤄᤢᤳᤋᤢᤛᤡ ॥ ᤌᤧᤀᤠᤱᤓᤧᤸᤗᤧ ᤀᤠᤕᤣᤴ ᤋᤠ᤺ᤴᤍᤡᤰᤐᤠ ᤁᤧᤄᤢᤶᤒᤠᤀᤠᤱ ᤁᤥᤕᤧᤶᤒᤠ ᤔᤧᤒᤥᤂᤧᤀᤠᤱ ᤔᤧᤘᤠ ॥ ᤂᤢᤴᤇᤡ᤹ ᤌᤠᤀᤡᤱ ᤔᤧᤃᤳᤋᤢ ᤁᤴ ᤂᤩᤠᤒᤧᤴ ᤀᤠ᤺ᤰᤂᤧᤴ ᤌᤠᤖᤡᤰ ᤕᤠᤱᤀᤥ ᤋᤠᤣ᤺ᤰ ᤁᤧᤗ᤹ᤒᤠᤴ ॥ ᤁᤴᤏᤠᤱ ᤐᤠᤀᤠᤏᤡ᤹ ᤁᤥᤕᤧᤶᤒᤠ ᤐᤠᤣ᤺ᤱᤔᤠᤖᤧ ᤋᤢᤶᤄᤥ (ᤏᤋᤡᤈᤠ) ᤖᤥ ॥
    ᤗᤠᤔᤡᤇᤠᤏᤧᤖᤧ ᤁᤩᤠᤳ ᤔᤠᤏᤧ ᤒᤡᤖᤠᤗᤥ ᤛᤢᤶᤈᤥᤀᤥ ᤛᤠᤵᤋᤢᤀᤠᤱ ᤐᤳ ॥ ᤋᤢᤰᤛᤡ ᤕᤣᤶᤑᤖᤡᤰ ᤁᤢᤴᤍᤣᤱᤒᤠᤸᤗᤧ ᤁᤢᤔᤡᤕᤱᤔᤠᤴ ᤜᤡᤱᤄᤢᤸᤗᤧ ᤁᤢᤜᤡᤶᤔᤥ᤹ᤀᤣ ᤔᤡᤕᤱᤔᤠᤴ ᤌᤠᤵ ॥ ᤁᤢᤛᤠᤜᤠ᤹ ᤜᤡᤱᤄᤢᤛᤡ ॥  ᤔᤡᤕᤱᤔᤠᤸᤗᤧ ᤁᤢᤛᤠᤜᤠ᤹ ᤛᤠᤏᤠ᤺ᤳ ᤛᤧᤳ ᤜᤢ᤹ᤖᤢᤛᤡᤸᤗᤧ ᤛᤢᤒᤠ᤹ᤎᤡᤰ ᤁᤢᤜᤡᤱᤘᤧᤳ ᤋᤧᤶᤛᤢᤋᤠᤖᤢᤀᤠᤱ ᤁᤢᤛᤠᤜᤠ᤹ᤖᤧ ᤜᤢᤴᤇᤡ᤹ᤐᤣᤛᤠᤱ ᤗᤧᤖᤢᤐᤡᤖᤢᤛᤡ ॥ ᤔᤡᤕᤱᤛᤠᤜᤠ᤹ᤖᤧ ᤛᤢᤒᤠᤀᤡᤴ ᤔᤧᤏᤠ᤺ᤳᤋᤢ, ᤋᤧᤶᤔᤠ ᤔᤧᤃᤠᤣ᤺ᤳᤋᤢ ॥ ᤛᤢᤒᤠ᤹ᤀᤡᤴ ᤗᤠᤣ᤺ᤰ ॥ ᤏᤠᤏᤠᤰᤏᤠ ᤁᤢᤶᤔᤠ ᤔᤡᤕᤱᤔᤠᤸᤗᤧ ᤛᤢᤒᤠᤀᤡᤴ ᤌᤣ᤺ᤰᤋᤢᤀᤠᤱ ᤕᤢᤱ ॥ ᤛᤠᤖᤡᤰ ᤗᤠᤣ᤺ᤰᤏᤧᤁᤖ ᤁᤢᤶᤔᤠ ᤔᤡᤕᤱᤔᤠᤸᤗᤧ ᤛᤢᤒᤠ᤹ᤀᤡᤴ ᤆᤠᤵᤐᤢᤳᤘᤠᤒᤢᤳ ᤐᤢᤳᤋᤢᤀᤠᤱ ᤛᤡᤔᤠᤏᤠ ᤜᤡᤱᤔᤠ ᤆᤥᤃᤢ ॥ ᤗᤠᤣ᤺ᤰ ᤔᤧᤴᤕᤠᤴᤏᤠ ᤆᤥᤃᤢᤀᤠᤱ ᤕᤠᤶᤔᤥ ᤔᤡᤕᤱ ᤛᤠᤜᤠ᤹ᤖᤥ ᤗᤧᤖᤢᤐᤡᤖᤢᤛᤡ ॥ ᤜᤣ᤹ᤏᤢ ᤔᤡᤕᤱᤛᤠᤜᤠ᤹ᤖᤧ ᤕᤠᤶᤔᤥ ᤛᤢᤒᤠ᤹ᤀᤡᤴ ᤔᤧᤏᤠᤳᤋᤢ ᤔᤧᤍᤧᤶᤛᤢ, ᤔᤧᤜᤠ᤹ᤖᤢ ॥ ᤀᤠ᤺ᤰᤂᤥ ᤛᤧᤳ ᤔᤧᤴᤕᤠᤴᤍᤢᤴᤏᤧᤁᤖ ᤁᤢᤶᤔᤠ  ᤔᤡᤕᤱᤔᤠᤸᤗᤧ ᤀᤣ ᤛᤢᤒᤠ᤹ᤀᤡᤴ ᤋᤧᤶᤛᤢᤀᤠᤱ ᤛᤧᤖᤢ᤹ᤐᤡᤖᤢᤛᤡ ॥ ᤁᤴ ᤜᤠᤕᤠᤰ ᤗᤠᤔᤡᤇᤠᤏᤣ ᤁᤢ ᤁᤢᤛ᤻ᤛᤠ ᤆᤢ᤺ᤰᤔᤠᤸᤗᤧ ᤀᤥᤔᤳᤇᤢᤖ ᤕᤣᤵᤛᤡ ॥ ᤁᤢᤶᤔᤠ ᤔᤡᤕᤱᤔᤠᤸᤗᤧ ᤁᤧᤗᤥᤰᤐᤠᤖ ᤁᤧᤒᤵᤐᤠ ᤛᤢᤒᤠ᤹ᤀᤡᤴ ᤋᤧᤶᤛᤢᤀᤠᤱ ᤆᤠᤵᤐᤢᤳ ᤐᤢᤳᤋᤢᤸᤗᤧ ᤗᤠᤔᤡᤇᤠᤏᤧᤖᤧ ᤁᤢᤛᤠ ᤆᤢ᤺ᤰᤔᤠᤸᤗᤧ ᤛᤢᤒᤠ᤹ᤀᤡᤴ ᤜᤣ᤹ᤏᤢ ᤂᤧᤳᤇᤢᤍᤣᤛᤢ ᤔᤧᤳᤋᤢ ᤗᤠᤔᤡᤇᤠᤏᤧ ᤁᤖ ᤗᤠᤔᤡᤇᤠᤏᤧᤖᤧ ᤂᤧᤵᤐᤠ ᤔᤧᤏᤢ᤹ᤀᤡᤴ ᤔᤡᤕᤱᤔᤠᤸᤗᤧ ᤁᤢᤕ᤺ᤠᤶᤒᤰᤁᤣ ᤛᤢᤒᤠ᤹ ᤋᤧᤶᤔᤠ, ᤛᤢᤒᤠ᤹ ᤛᤧᤵᤔᤠ ॥ ᤛᤍᤣ ᤀᤠᤴᤇᤡ᤹ ᤛᤢᤒᤠᤜᤠ᤹ ᤀᤠᤄᤣᤳᤛᤡᤀᤠᤱ ᤔᤡᤕᤱᤔᤠᤸᤗᤧ ᤌᤧ᤺ᤴ ᤆ ᥅ ᤕᤠᤶᤔᤥ ᤛᤍᤣ ᤀᤠᤴᤇᤡ᤹ ᤛᤢᤒᤠ᤹ᤜᤠ᤹ ᤂᤧᤳᤔᤠᤛᤡᤖ ᤔᤡᤕᤱᤗᤧ ᤁᤢᤀᤣ᤺ᤰ ᤁᤢᤀᤣ᤺ᤰ ᤘᤠᤔᤠᤀᤠᤱᤛᤣ ᤀᤠᤴᤛᤢᤰᤛᤢᤴ ॥ ᤗ᤹ᤖᤡᤰ ᤆᤢ᤺ᤰᤔᤠ ᤜᤡᤴᤈᤠ᤹ᤀᤡᤴ ᤋᤠᤈᤧᤰᤋᤢ ॥ ᤀᤠᤖ ᤀᤠᤸᤗᤥᤒᤠ ᤁᤴ ᤁᤥᤕᤣᤶᤒᤠ ᤕᤣᤶᤀᤥ ᤀᤠᤏᤡ᤹ ᤁᤥᤕᤧᤶᤒᤠ ᤕᤠᤵᤔᤡᤜᤠ᤹ ᤜᤠᤳᤗᤧ ᤋᤠ᤹ ᤀᤠᤈᤧᤰᤐᤠ ᤀᤡ ᥅ ᤔᤡᤕᤱᤒᤠᤖᤧ ᤁᤢᤕᤠᤶᤒᤰ ᤌᤣ ᤑᤠ᤹ᤀᤠᤱ ᥅   
        ᤁᤴ ᤁᤥᤕᤧᤶᤒᤠ ᤕᤧᤶᤀᤥᤒᤠ  ᤀᤠᤏᤡ᤹ ᤁᤥᤕᤧᤶᤒᤠ ᤕᤠᤵᤔᤡᤜᤠ᤹ᤖᤧ ᤁᤥᤕᤧᤶᤒᤠ ᤀᤠᤈᤥᤃᤢᤶᤛᤡᤶᤒᤠ ᤔᤡᤕᤱᤒᤠᤖᤧ ᤛᤢᤒᤠ᤹ ᤔᤧᤴᤍᤧᤶᤛᤢᤛᤡᤴ ॥ ᤂᤩᤠᤒᤠᤖᤧ ᤛᤒᤠ ᤔᤧᤴᤏᤠᤳᤋᤢᤛᤡᤴ ॥ ᤜᤣᤰᤁᤣᤃ ᤕᤠᤶᤔᤥ ᤁᤥᤕᤧᤶᤒᤠ ᤕᤧᤶᤒᤠ ᤁᤥᤕᤧᤶᤒᤠ ᤛᤒᤠ ᤏᤠᤵᤔᤠᤛᤡᤖ ᤘᤠᤔᤠᤀᤠᤱ ᤔᤧᤒᤠᤣ᤺ᤱᤏᤧᤴ ॥ ᤀᤠᤖ ᤛᤒᤠ  ᤛᤡᤱᤗᤠᤀᤥ ᤔᤧᤕᤠᤰᤁᤡᤸᤗᤧᤏᤧ ᤜᤡᤶᤔᤥ ᤀᤡᤰᤋᤠᤵ (ᤒᤠᤖᤡ) ᤐᤩᤠᤱᤛᤡᤀᤥ ᤔᤧᤍᤠᤑᤠᤱ ᤏᤠ᤺ᤵᤔᤠᤛᤡᤐᤠᤣ᤺ᤱ ॥ ᤀᤠᤸᤗᤥᤒᤠ ᤛᤒᤠ ᤐᤠᤱᤕᤰ ᤐᤠᤱᤕᤰ, ᤔᤠᤱᤜᤡᤶ ᤔᤠᤱᤜᤡᤶ ᤔᤧᤕᤠᤰ ॥ ᤀᤠᤖ ᤔᤠᤱᤜᤡᤶ ᤃ ᤗᤳᤌᤡᤰᤗᤧᤴᤗᤰ ᤔᤧᤒᤠᤣ᤺ᤱᤏᤧᤴ ᤜᤠᤕᤠᤰᤗᤧᤴ ᤐᤥᤱ ॥ ᤁᤀᤥ ᤏᤠ᤺ᤳᤇᤡᤱᤔᤠᤖ ᤏᤧᤔᤠᤀᤠᤱᤛᤣ ᤔᤧᤏᤢ᤹ᤖᤧᤴᤒᤠ ॥ ᤕᤠᤶᤔᤥ ᤀᤠᤕᤣᤴ  ᤀᤠᤏᤡ᤹ ᤏ᤺ᤠᤵᤔᤠᤛᤡ ᤋᤠ᤺ᤴᤍᤡᤰ ᤂᤢᤴᤇᤡ᤹ ᤀᤠᤶᤏᤠ᤺ᤳᤐᤡ ᤌᤣᤀᤡ ᤌᤣᤀᤡ ॥ ᤕᤣᤶ ᤛᤍᤣ ᤗᤳᤌᤡᤰ ᤔᤧᤒᤠᤣ᤺ᤱᤏᤧᤴ ॥ ᤐᤠᤜᤧᤁᤩᤠᤛᤧᤀᤡᤗᤠ ᤀᤠᤸᤗᤥᤒᤠ ᤁᤥᤕᤧᤶᤒᤠ ᤕᤧᤶᤀᤥ ᤏᤧᤘᤠᤗᤠ ᤁᤠᤌ᤻ᤔᤠᤴᤍᤢᤒᤠ ᤛᤫᤕᤶᤓᤢᤀᤥ ᤂᤩᤠᤒᤠᤏᤢ ᤛᤠᤒᤠ ᤜᤢᤴᤇᤡ᤹ ᤀᤣ᤺ᤰ ᤀᤢᤰᤏᤧᤳᤇᤡ ᤐᤡ᤹ᤏᤧᤳᤇᤡᤖ ᤛᤥᤖᤡᤰ ᤀᤡᤶᤛᤡᤀᤠᤱ ᤏᤧᤛᤡ ॥ ᤀᤠᤵᤑᤠᤸᤗᤧ ᤀᤠᤶᤔᤠᤖᤧ ᤁᤴᤜᤜᤠ᤹ ᤏᤡᤛᤢᤛᤡᤀᤠᤱ ᤕᤠᤶᤔᤥ ᤐᤠᤱᤓᤣ᤹ᤒᤠ ᤛᤒᤠ, ᤐᤠᤱᤓᤣ᤹ᤒᤠ ᤂᤩᤠᤒᤠ ᤏᤢ ᤐᤠᤱᤕᤰᤐᤠ ᤛᤒᤠ ᤂᤩᤠᤒᤠ ᤛᤧᤴ ᤜᤣ᤺ᤰᤋᤢᤛᤡ ॥ ᤁᤴᤓᤖᤡᤰᤗᤰ ᤔᤧ᤺ᤴ ᤀᤠᤸᤗᤥᤒᤠ ᤁᤥᤕᤧᤶᤒᤠ ᤁᤣᤒᤠ, ᤜᤠ᤺ᤶᤒᤠ, ᤔᤠᤕᤢᤒᤠ  ᤋᤰᤔᤡᤒᤠᤜᤠ᤹ ᤛᤡᤱᤗᤠᤀᤥᤖᤰ ᤔᤧᤴᤕᤠᤰᤁᤡᤴᤏᤠᤱ ᤐᤠᤱᤓᤣ᤹ ᤐᤠᤱᤓᤣ᤹ ᤐᤠᤱᤕᤰ ᤐᤠᤱᤕᤰ ᤗᤴ ᤔᤣᤜᤣ᤺ᤰᤋᤧᤒᤠ ᤏᤡᤍᤧᤳ ॥ ᤔᤡᤳᤗᤡᤱᤗᤰ ᤒᤷᤍᤡᤕᤠ ᤖᤠᤛ᤻ᤋᤡᤕ ᤏᤡᤁᤢᤴᤈᤀᤥ ᤏᤡᤃᤵᤗᤠᤣ᤺ᤰ (ᤔᤥᤋᤷ ᤛᤠᤀᤡᤁᤸ/ᤍᤢᤀᤡ ᤆᤰᤁᤧ) ᤀᤥ ᤁᤧᤗᤠᤣ᤺ᤰᤐᤠᤖ ᤁᤧᤒᤵᤐᤠ ᤕᤠᤶᤔᤡᤜᤠ᤹ ᤁᤣᤒᤠᤖᤧ ᤜᤠ᤹ᤖᤢᤛᤡ ᤛᤧᤖᤢᤛᤡ ॥ ᤀᤤᤗᤠᤶ ᤀᤢᤴᤇᤠᤣ᤺ᤴ ᤆᤡᤋᤘᤴᤀᤥ ᤋᤰᤔᤡᤒᤠᤖᤧ ᤕᤠᤵᤔᤡᤎᤡᤰ ᤌᤠᤵᤛᤢᤛᤧᤖᤢ ॥ ᤁᤴᤜᤠ᤹ ᤜᤠᤕᤠᤰ ᤀᤠᤏᤡ ᤕᤠᤵᤔᤡ ᤁᤥᤕᤧᤶᤒᤠ ᤐᤠᤣ᤺ᤱᤔᤠᤖᤧ ᤋᤢᤶᤄᤥ (ᤏᤋᤡᤈᤠ) ᤛᤡ᤹  ॥ ᤀᤠᤏᤡ ᤀᤢᤛᤢᤖᤢᤖᤰ ᤁᤠᤣ᤺ᤵᤔᤠᤖᤧᤧ ᤋᤢᤶᤄᤥ ᤛᤡ᤹ ॥ ᤛᤡᤱᤗᤠ᤹ ᤑᤠ᤹ᤀᤡᤴ ᤌᤰᤛᤠ ᤐᤛᤠᤖᤧᤴᤏᤠᤱ ॥ ᤜᤧᤴ ᤛᤡᤱᤗᤠᤖᤧ ᤁᤢᤖᤢᤶᤔᤥ᤹ᤏᤠ ᤀᤠᤏᤡ᤹ ᤗᤠᤎᤠᤖᤧᤴ ᤗᤠᤶ ᤀᤠᤍᤕᤢᤶᤔᤠᤱ ᤀᤠᤗᤠᤣ᤺ᤰᤗ ᤀᤠᤏᤧ ॥ ᤜᤧᤴ ᤗᤠᤶᤖᤧ ᤌᤰᤛᤠ ᤐᤢᤛᤠ ᤀᤠᤰᤂᤧᤴ ᤜᤶᤛᤢᤛᤡᤀᤠᤱᤏᤧ ᤁᤧᤗ᤹ᤒᤠ ᤀᤠᤏᤡ᤹ ᤀᤠᤴᤀᤡᤳᤋᤢᤶᤔᤡᤴ ॥ ᤜᤧᤰᤁᤩᤠᤱ ᤁᤣᤒᤠᤖᤧ ᤋᤱᤒᤣᤌᤵᤔᤠ ᤕᤠᤵᤔᤡ ᤆᤛᤡ ᤀᤠᤗ᤹ ॥ ᤜᤧᤴᤎᤠᤰ ᤕᤶᤒᤠ ᤋᤰᤔᤡᤒᤠᤴ ᤆᤢᤰᤛᤠ ᤕᤠᤵᤔᤡᤎᤡᤰ ᤁᤢᤎᤣ᤺ᤰᤐᤥ ᤌᤥ ᤕᤢᤱᤛᤡᤱᤅᤠᤱ ᤂᤠᤱᤅᤠᤱ ᤂᤠᤱ ᤑᤧᤴᤈᤣᤸᤗᤧ ᤀᤃᤢᤖ ᤕᤢᤱ ॥ ᤜᤧᤰᤁᤩᤠ ᤋᤰᤔᤡᤒᤠᤖᤧ ᤀᤠᤴᤎᤠᤶᤔᤡᤴ ᤀᤠᤴᤛᤧᤳᤋᤡᤴᤏᤠᤅ ᤌᤣ ᤀᤠᤔᤧᤳ ᥅ ᤂᤢᤏᤣᤀᤠᤱᤛᤧ ᤁᤢᤏᤡᤱᤘᤠ᤹ ᤘᤠ ᤗᤠ᤹, ᤁᤢᤛᤡᤱᤛᤠᤱ ᤘᤠ ᤗᤠ᤹ ᤁᤢᤗᤢᤱᤔᤠ ᤕᤠᤰ, ᤁᤢᤛᤡᤰ ᤐᤠᤣ᤺ᤰ ᤗᤠ᤹ ॥ ᤀᤠᤏᤡ᤹ᤜᤣᤰᤁᤣ ᤐᤠ᤺ᤵᤔᤠ ᤆᤧᤱᤔᤠ ᤔᤧᤴᤛᤢᤰᤔᤠ ᤘᤣ᤹ ᤐᤠ᤺ᤴ ॥  ᤁᤴ ᤗᤧᤶᤑᤠᤱ ᤀᤠᤏᤡ᤹ ᤕᤠᤵᤔᤡᤖᤧ ᤀᤠᤵᤑᤠᤸᤗᤧᤀᤠᤱ ᤀᤠᤴᤀᤡᤋᤢᤶᤔᤡᤴ ॥ ᤕᤠᤱᤏᤡᤶᤗᤧ ᤗᤳᤌᤡᤰ ᤁᤥᤒᤥᤖᤠᤰ, ᤀᤡᤰᤛᤠᤂᤠᤶᤒᤣ᤺ᤰᤗᤧ ᤁᤢᤄᤣᤶᤛᤡᤱ ᤌᤰᤛᤠ ᤐᤢᤛᤠᤜᤠ᤹ ᤀᤠᤏᤡ᤹ ᤕᤠᤱᤗᤧᤰᤘᤠ ᤐᤠᤱᤃᤣᤘᤠᤖᤰ ᤀᤠᤀᤡᤳᤋᤢᤶᤛᤡᤶ ॥ ᤛᤡᤱᤒᤢᤱ ᤗᤢᤱᤒᤢᤱ ᤀᤠᤔᤠᤴᤍᤢᤶ ॥ ᤛᤡᤱᤗᤠ ᤀᤠᤗᤧ᤺ᤰᤂᤢᤶ ᤀᤠᤔᤠᤴᤍᤢᤶ ॥ ᤐᤠᤜᤧᤰᤁᤩᤠᤀᤡᤗᤠ ᤀᤠᤸᤗᤥᤒᤠ ᤁᤥᤕᤧᤶᤒᤠ ᤕᤧᤶᤒᤠ ᤕᤱᤄᤱ, ᤕᤠᤰᤛᤠᤱᤘᤠ (ᤂᤥᤸᤛᤠ) ᤖᤧᤀᤠᤱ ᤗᤠᤶ ᤏᤡᤔᤠ ᤗᤧᤖᤢ᤹ᤀᤠᤱ ᤘᤠ ॥ ᤏᤠᤱᤒᤣ᤺ᤰᤁᤠᤱ ᤐᤠᤱᤓᤣ᤹ ᤐᤠᤱᤕᤰ ᤋᤠᤰᤁᤴᤏᤡ ᤘᤠᤃᤳ ॥ ᤌᤣᤀᤠᤱᤓᤠᤸᤗᤧ ᤁᤥᤕᤧᤶᤒᤠ ᤏᤠᤶᤕᤠᤵᤔᤡᤖᤧ ᤆᤫᤠᤖᤧ ᤁᤢᤗᤠᤶ, ᤕᤱᤄᤱᤗᤧ ᤁᤢᤗᤠᤶ ᤀᤠᤏᤠᤵᤋᤢᤶᤔᤠᤱ ᤏᤢᤒᤠ ᤏᤢᤒᤠ ᤁᤥᤕᤧᤶᤒᤠ ᤜᤡᤶᤎᤠᤱᤜᤠ᤹ ᤀᤠᤗᤣ᤺ᤳᤋᤢᤶᤔᤠᤱ ᤀᤠᤕᤢᤱ  ॥ ᤁᤴᤓᤖᤡᤰᤗᤰ ᤔᤧ᤺ᤴ ᤀᤠᤸᤗᤥᤒᤠ ᤁᤥᤕᤧᤶᤒᤠ ᤘᤠᤜᤡᤳ ᤛᤠᤶᤔᤡᤳᤋᤠᤱ ᤔᤧᤏᤠᤰᤂᤧ ᤔᤧᤒᤣ ॥ ᤘᤠᤜᤡᤳ ᤌᤠ᤺ᤸᤗᤧ ᤕᤖᤡᤰ ᤌᤠᤒᤧᤴ ᤌᤠ ᤒᤤ ᤆᤠᤣ᤺ᤰ ॥ ᤔᤧᤎᤠᤏᤧᤴᤏᤡᤸᤗᤧ ᤌᤠᤔᤠᤀᤣ ᤏᤡᤱᤘᤠᤓᤢᤳᤇᤢ ॥ ᤀᤠᤸᤗᤥᤒᤠ ᤁᤥᤕᤧᤶᤒᤠ ᤕᤧᤶᤒᤠ ᤗᤠ ᤏᤠᤶᤔᤠᤱ ᤀᤠᤏᤡ᤹ᤏᤢ ᤏᤡ᤺ᤳᤋᤠᤱ ᤏᤡ᤺ᤳᤋᤠᤱ ᤐᤠᤣ᤺ᤱᤗ ᤐᤳ ॥  ᤏᤠᤶ ᤏᤡ᤺ᤳᤋᤠᤱ ᤐᤠᤣ᤺ᤰᤂᤧᤀᤠᤱ ᤏᤠᤶᤗᤠᤱ ᤀᤡ᤺ᤳᤗ ᤐᤣ᤺ᤰᤗ ᤐᤳ ॥ ᤏᤠᤱᤈᤱᤜᤠ᤹ ᤔᤠᤰᤛᤡᤱᤕᤠᤖᤡᤰ ᤗᤧᤰᤆᤠᤐᤎᤡᤰ ᤗᤧᤰᤆᤠᤐᤎᤡᤰ ᤆᤥᤃᤢᤛᤡᤖ ᤀᤥ᤹ᤖᤢᤛᤡᤀᤠᤱ ᤔᤧᤃᤢᤱ ॥ ᤀᤠᤸᤗᤃ ᤁᤥᤃᤧᤶᤒᤠ ᤏᤠᤱᤈᤱ ᤀᤠᤰᤂᤣᤍᤶᤒᤠ ᤔᤧᤈᤠᤣ᤺ᤰ ᤑᤠᤸᤗᤧᤃ ᤔᤠᤰᤛᤡᤱᤃᤩᤠᤵᤐᤠ ᤔᤡᤄᤠᤰ ᤜᤣᤰᤁᤣᤍᤶᤒᤠ ᤐ᤺ᤠᤶᤔᤠ ᤁᤧᤒᤠᤣ᤺ᤱᤒᤠ ᤐᤠᤣ᤺ᤰᤂᤧᤔᤠᤖᤧ ॥ ᤐᤠᤃᤴ ᤀᤡᤛᤡᤰ ᤀᤠᤏᤡ᤹ ᤁᤥᤕᤧᤶᤒᤠ ᤀᤠᤒᤥᤱᤗ ᤀᤠᤒᤣᤰᤏᤧᤁᤖ ᤌᤡᤰᤕᤣᤴ ᤀᤠᤏᤡ᤹ ᤏᤠᤶᤗᤧ ᤀᤠᤀᤥ᤹ᤀᤠᤛᤧᤳᤐᤠ ᤋᤥᤴᤍᤥᤴ ᤏᤡᤍᤧᤳ ॥ ᤜᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤀᤠᤏᤡ᤹ ᤁᤥᤕᤧᤶᤒᤠ ᤐᤠᤣ᤺ᤱᤔᤠ ᤗᤧᤵᤔᤠᤀᤠᤱ ᤔᤡᤕᤱᤒᤠᤜᤠ᤹ ᤔᤡᤅᤱᤒᤠᤖᤧ ᤜᤢᤴᤇᤡ ᤕᤠ᤺ᤶᤒᤰ ᤆᤠᤣ᤺ᤰ ᤐᤠᤱᤔᤠᤐᤠᤣ᤺ᤱ ॥ ᤜᤢᤴᤇᤡ᤹ ᤋᤧᤴᤀᤥ ᤘᤠ ᤐᤠᤱᤔᤠᤛᤡᤒᤠᤣ᤺ᤱ ॥ ᤂᤩᤠᤒᤠᤜᤠ᤹ ᤂᤩᤠᤒᤠᤖᤧ ᤜᤢᤴᤇᤡ᤹ ᤋᤧᤴᤀᤥ ᤗᤧᤵᤔᤠᤛᤡᤒᤠᤣ᤺ᤱ ॥ ᤛᤒᤠ, ᤜᤠ᤺ᤶᤒᤠ, ᤋᤰᤔᤡᤒᤠᤜᤠ᤹ ᤜᤢᤴᤇᤡ᤹ ᤀᤠᤒᤠᤱᤅᤣ ᤋᤧᤴ ᤏᤧ ॥ ᤜᤢᤴᤇᤡ᤹ ᤋᤧᤴ ᤛᤢᤔᤠ / ᤏᤠᤵᤔᤠ ᤐᤡ᤹ᤔᤠᤛᤡ ᤔᤧ᤺ᤴ ॥ ᤆᤫᤠᤖᤧ, ᤕᤱᤄᤱᤗᤧ, ᤘᤖᤰᤗᤧ, ᤏᤠᤶᤖᤧ, ᤗᤠᤖᤧ ᤀᤠᤒᤠᤱᤅᤣ ᤀᤠᤒᤠᤱᤅᤣ ᤜᤢᤴᤇᤡ᤹ ᤋᤧᤴ ᤏᤧ ॥ ᤜᤢᤴᤇᤡ᤹ ᤗᤠᤶ ᤏᤧ ᤜᤧᤴ ᤛᤢᤔᤠ ᤐᤡ᤹ᤔᤠᤛᤡ ᤔᤧᤏᤢ᤹ᤀᤡᤴ ॥ ᤜᤣᤰᤁᤣᤸᤗᤧ ᤀᤠᤏᤡ᤹ᤀᤠᤱ ᤀᤠᤒᤠᤱᤅᤣ ᤗᤠᤶ ᤔᤧᤴᤛᤢᤛᤢᤏᤧᤴ ॥ 
᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆᥆
    ᤛ᤹ᤘᤠᤜᤠ᤹ᤖᤧ ᤜᤢᤴᤇᤡ᤹ ᤂᤢ᤺ᤴ ᤀᤠᤒᤠᤕᤣᤑᤠ᤹ᤀᤠᤱ ᤔᤧᤛᤢᤵᤛᤢᤒᤠ ᤔᤧ᤺ᤴ ॥ ᤑᤢᤱᤜᤠ᤹ ᤀᤠᤒᤠᤱᤅᤣ ᤏᤢᤒᤠ ᤌᤠ᤺ᤶᤛᤡᤱᤔᤠ ᤑᤠ᤹ᤀᤠᤱ ᤔᤧᤓᤣᤰᤐᤠ ᤔᤧ᤺ᤴ ॥  ᤏᤠ᤺ᤱᤈᤱᤜᤠ᤹ ᤀᤠᤒᤠᤱᤅᤣ ᤂᤧᤶᤛᤡᤔᤠ ᤑᤠ᤹ᤀᤠᤱ ᤔᤧᤗᤧᤰᤐᤠ ᤔᤧ᤺ᤴ ॥ ᤏᤠᤶᤔᤡᤴ ᤀᤠᤒᤠᤱᤅᤣ ᤌᤥ᤹ᤛᤡᤱᤔᤠ ᤑᤠ᤹ᤀᤠᤱ ᤐᤡᤴᤒᤠ ᤔᤧᤴ ॥ ᤘᤣ᤹ᤖᤧ ᤑᤠ᤹ᤀᤠᤱ ᤜᤡᤱᤔᤠ ᤕᤠᤱᤏᤡᤶᤖᤧ ᤁᤢᤃᤥ ॥ ᤀᤠᤏᤡ᤹ ᤀᤠᤒᤠᤱᤅᤣᤖᤧ ᤑᤠ᤹ᤀᤠᤱᤗᤰ ᤜᤡᤱᤔᤠ ᤔᤧ᤺ᤴ ॥ ᤗᤳᤌᤡᤰᤗᤧ ᤗᤳᤌᤡᤗᤧᤴ ᤑᤠ᤹ᤛᤡᤱ ᤆᤥᤰᤔᤠᤑᤠ᤹ᤀᤠᤱ ᤁᤴ ᤀᤡᤰᤛᤠᤂᤠᤶᤒᤣ᤺ᤰᤀᤥ ᤀᤠᤏᤡ᤹ ᤜᤠᤕᤠᤰ ᤛᤠᤘᤠ᤺ᤴ ᤀᤠᤒᤠᤣ᤺ᤰᤂᤧᤒᤠ ॥ ᤁᤀᤥ ᤜᤡᤱᤔᤠ ᤀᤠᤰᤂᤧᤴ ᤆᤠ᤹ ॥ ᤀᤠᤏᤡ᤹ ᤀᤢᤛᤢᤖᤢ ᤀᤠᤒᤠᤣ᤺ᤱᤅᤡᤸᤗᤧ ᤀᤠᤏᤡ᤹ ᤏᤡᤱᤘᤠ ᤜᤠᤱ ᤜᤠᤱ ᤐᤠᤣ᤺ᤱ ᤁᤖ ᤀᤠᤏᤡ᤹ ᤑᤠ᤹ᤛᤡᤱᤅᤥ ᤘᤣ᤹ᤖᤧᤴ ᤜᤡᤱᤔᤴ ᤀᤢᤛᤢᤖᤢ ᤐᤠᤣ᤺ᤱᤅᤡᤸᤗᤧ ᤀᤠᤏᤡ᤹ ᤏᤡᤱᤘᤠ ᤜᤧᤴᤏᤢᤸᤗᤧ ᤕᤖᤡᤰ ᤜᤠᤱᤜᤠᤱ ᤐᤠᤣ᤺ᤱ ॥